شاركونا بأخباركم! اضغط هنا ...

خطة رمضان

محرر الخبر: موقع هسا | تاريخ النشر: 4 أغسطس, 2012 | القسم: دين ودنيا

رمضان فرصة ذهبية لحصد الحسنات, علشان كده لازم نركز على قد طاقتنا إزاي نعمل أكبر قدر من الحسنات والخيرات.

الحسنة في رمضان بسبعين فيما سواه , زمن أتى فيه نافلة كانت كأجر فريضة

وعلشان نضمن أننا ما ننساش حاجة هنحط أهم نقاط كسب الحسنات , وطبعاً اللي يقدر يزود ربنا يكرمه

أولا الصلاة : الصلاة هي عماد الدين , من أقامها فقد أقام الدين ومن هدمها فقد هدم الدين

يبقى لازم نحافظ على الصلاة في أول وقتها , يعني أول ما الأدان يدن نقوم نجري نتوضا ونصلي علطول , وطبعاً الكلام ده يشمل صلاة الفجر مش أربع صلوات انتظام والفجر نصليه قضا.موافقين

وسنن الصلاة المؤكدة فرصة عظيمة جداً لكسب الحسنات في الشهر الكريم وهما كلهم على بعض 12 ركعة في اليوم . ركتين قبل صلاة الفجر وأربع ركعات قبل الظهر وركعتين بعد صلاة الظهر وركعتين بعد صلاة المغرب وركعتين بعد صلاة العشاء , وكان الرسول صلى الله عليه وسلم يحافظ على سنة الفجر حفاظاً شديداً لدرجة أنه كان يقضيها إذا فاتته

الشفع والوتر , وأقلها للشفع ركعتين وللوتر ركعة , وكان الرسول صلى الله عليه وسلم يحافظ على صلاة الوتر حفاظاً شديداً أيضاً

فلنحاول الحفاظ على الصلوات المفروضة في أول وقتها وعلى السنن المؤكدة والشفع الوتر قدر الإمكان

أحلى صلاة في رأي هي صلاة التهجد , لو ركعتين بس قبل صلاة الفجر بنص ساعة , البني آدم مننا مع ربنا وبس مفيش أحلى من كده, هتحسوا فعلاً بحلاوة الإيمان

ثانياً قراءة القرآن : نحاول قراءة جزء من القرآن يومياً بتدبر وتمعن لنفهم معانيه, وكذلك نراعي أن تون قراءتنا صحيحة ونطقنا للحروف سليم , فإن لم نستطيع قراءة جزء فصفحة كل يوم أو على الأقل أية بتفسيرها ونحاول تطبيقها في حياتنا اليومية

ونحاول تخصيص وقت نقرأ فيه القرآن وأكثر الأوقات المناسبة لذلك في الفترة من الفجر للشروق و في صلاة القيام وفي صلاة التراويح وقبل المغرب بساعة

ولو أستطعنا أن نقوم بحفظ بعض أيات كل يوم فهذا جميل , وممكن كل منا يختار أكثر سور القرآن قرباً لنفسه ويحبها و يعقد النية على حفظها في رمضان وقرااءة تفسيرها وفهمها ومحاولة تطبيق ما بها من تعاليم الدين.

ثالثاً الصوم نفسه : فرب صائم ليس له من صيامه إلا الجوع والعطش ورب قائم ليس له من قيامه إلا السهر

نصوم مع بعض السنة دي بجوارحنا كمان إن شاء الله

وربنا يساعدنا ويقوينا كلنا على طاعته

من صام رمضان إيماناً واحتساباً غفر له ما تقدم من ذنبه

رابعاً الصدقة : إخراج صدقة صغيرة كل يوم مهما كانت نقود أو ظعام أو ملابس أو مستلزمات للمنزل , كل على قدر استطاعته , كل يوم , كل يوم علشان تصبح لدينا عادة التصدق.

ولا تنقص صدقة من مال

خامساً بر الوالدين : مساعدة الأم والأب وتنفيذ طلباتهم بصدر رحب وحب بدون مجادلة وعصبية وأيضاً فعل ما يحبونه بدون أن يطلبوا والإبتسامة في وجهمم وأن نشعرهم أنهم أغلى ما لدينا وأن رضاهم عنا بالدنيا وما فيها , ولو كانوا متوفيين فبرهم بالدعاء المستمر لهم.

سادساً الدعاء : بجد بجد الدعاء جميل أوي , مهما كان طلبك من ربنا صغير وتافه أطلبه من ربنا, ربنا قريب أوي مننا

أقولكوا على حكاية يمكن البعض يقول عليه تافهة : كنت في مرة مروحة مع زوجي بيتنا في عربيتنا وكنا تعبانين أوي والشارع بتاعنا علطول زحمة ومفهوش ركنة , ركزت وطلبت من ربنا بكل قلبي أننا لاقي ركنا قريبة من البيت وطلبت وأنا موقنة بالإجابة , تصوروا لقينا ركنة قدام باب العمارة

ربنا كريم أوي

الدعاء ليه ثواب كبير جداً مش بس إجابة الدعوى , لأن ربنا بيحب أننا ندعي ونطلب منه

سيدنا موسى كان ليه شعارا في حياته وهو ” عجلت إليك ربي لترضى ” وأنا قلت لنفسي هعمل شعار لي زي سيدنا موسى وزي الحملات الإعلانية

وقلت أنا شعاري هيبقى “الدعاء في الصغيرة والكبيرة” وققررت أني أبقى أشطر واحدة في الدعاء وكل حاجة وأي حاجة هطلبها من ربنا .

وممكن نكتب قائمة بالدعوات اللي نفسنا فيها ونفضل ندعيها كل يوم ونلح في الدعاء صبح وبالليل ونتحرى أوقات وأماكن إجابة الدعوى , وربنا أكيد أكيد مش هيرد أيدينا المرفوعة فاضية.

سابعاً الذكر: الذكر حاجة سهلة أوي وثوابها جامد جداً

عندنا أذكار ما بعد الصلاة , وعندنا أذكار الصباح والمساء وعندنا أذكار الإستغفار والثناء والتسبيح

وكمان مننساش الصلاة على سيدنا محمد باستمرار

ثامناً صلة الرحم : رمضان موسم الزيارات , بس ناخود بالنا إن صلة الرحم مش مجرد أننا نزور القرايب اللي متعودين نزورهم , صلة الرحم كمان أننا نتواصا مع الأقرباء اللي أنقطعت علاقتنا بيهم , ونستحمل شوية لو هما مش متقبلين تقربنا منهم , علشان الثواب عظيم جداً

ثامناً النميمة والغيبة : ممكن منجبشي سيرة حد خالص , يا ريت نفتكر الحلو بس وننسى الوحش خالص علشان ذنبهم كبير أوي . ولو حصل لقينا الناس اللي حوالينا بيجيبوا في سيرة حد , نحاول نغير الموضوع أو نلفت أنتباهم بطريقة ظريفة أو على الأقل نسيب المكان بهدوء وكمان نبتعد عن اللغو في الحديث يعني مثلاً شفتي فلانة لبسة أيه , ملوش لازمة الكلام ده خالص

تاسعاً الصدق : لا للكذب فالصدق مٌنجي , لا داعي للكذب فليس منه فائدة , حتى لو رأي أحدنا أنه ينجيه من المشاكل فهي نجاة مؤقتة , وسرعان ما ستتأزم الأمور , لكن الصدق هو النجاة الحقيقة من كل مأزق.

وفي حاجة منتشرة أوي دلوقتي وهو كدب الهزار , ياريت نبطله برده لأنه بيتحسب علينا كدب وبناخود عليه سيئات

عاشراً الخلق الحسن : الدين المعاملة , والجيث المشهور عن الرسول صلى الله عليه وسلم ” إنما بعث متمماً لمكارم الأخلاق “

طبعاً عارفين خناقات رمضان المتكررة في الشوارع قبل الفطار

حسن الخلق هو أحد الأهداف السامية لرسالة الإسلام , يا ريت نجتهد في تحقيق أهداف دينا .

أحدى عشر العمل : تعبانيين وسهرانين وعطشانين وجعانين والحل الوحيد اللي بنعمل إننا ننام في شغلنا

أنتوا عارفين أن كده فلوسنا اللي هنقبضها تبقى فلوس حرام علشان مشتغلناش بيها

حد فينا يرضى يأكل ولاده من فلوس حرام

يا ريت كلنا وبقول لنفسي قبلكوا , يا ريت ناخود بالنا من شغانا وخصوصاً في رمضان

اثنى عشر الدعوة إلى الله : عن طريق حث الزملاء والأصدقاء والمعارف على فعل الخيرات والطاعات والتقرب إلى الله والبعد عن المعاصي

ثالث عشر التلفزيون : طبعاً القنوات الفضائية بتتنافس بشراسة طول فترة رمضان على جذب المشاهدين وإرضاء أذواقهم بمختلف صنوف المسلسلات والبرامج والمسابقات

بس الحقيقة هما مش بيتنافسوا لإرضائنا , لأ أبداً هما بيتنافسوا على فلوس الإعلانات

وأحنا بمنتهى البساطة بنديهم أغلى وقت في حياتنا اللي الحسنة فيه بسبعين

نحاول مع بعض أننا نوقف فرجة على التلفزيون في رمضان , الموضوع صعب أنا عارفة أن أحنا أتعودنا إن رمضان يساوي تلفزيون

معلش كل حاجة بتيجي بالتدرج واللي مش هيقدر يمنع التلفزيون يا ريت يكتفي بمشاهدة برنامج واحد في اليوم ويا ريت يكون برنامج هادف , وفي فعلاً برامج كويسة ومفيدة

تنويه: تعليقات الزوار الكرام المنشورة تعبر عن رأي اصحابها فقط ولا تعبر عن رأي موقع هسا بتاتاً.
يرجى الحفاظ على مستوى المشاركه في التعليقات وعدم تعدي الحدود او المس باشخاص او التعليق بما ليس له علاقة بالموضوع المنشور.

أضف تعليقاً

لن يتم نشر عنوان بريدك الإلكتروني.