شاركونا بأخباركم! اضغط هنا ...

باقة الغربية: أُمسية مميزة في المركز الجماهيري

محرر الخبر: موقع هسا | تاريخ النشر: 27 أبريل, 2014 | القسم: الأخبار الرئيسية, الأخبار المحلية

باقة الغربية  (22)

اقامت مجموعة فوتوغرافيات ومجموعة الخير فينا بالتعاون مع المركز الجماهيري – باقة الغربية ، وقسم الشبيبة في بلدية باقة الغربية أُمسية ثقافية وذالك يَوم أَمس ، الخميس الموافق 24 من ابريل .

افتتحت الامسية في تمام الساعة السادسة بمعرض صور لأعضاء فوتوغرافيات ، حيث ولاقى المعرض استحسان الحضور ، يُذكر ان المعرض سيستمر في المركز الجماهيري لمدة أسبوع .

ومن ثم كانت الكلمة لمندوبة مجموعة فوتوغرافيات آيات مصاروة حيث قالت : “إِن البداية الصعبة التي واجهت المصورين وإنتهت بنجاح اول معرض للمجموعة كان بفضل ايمان المجموعة بموهبتها وهدفها ، ولن ننسى ان نشكر كل من دعم المجموعة ، سواء من الانوار مقالدة ومطبعة الانس ومطبعة ثينك ديزاين والمركز الجماهيري وقسم الشبيبة في البلدية ، وكل هذا وأَكثر فقط لأن خلف كل صورةٍ حكاية”

ومن ثم كانت الكلمة لمالك مواسي ، مندوب مجموعة “الخير فينا” ، حيث بدأ مالك سارداً قصة شخصية أَقنعته شخصياً بالتطوع وحدثت معه فعلياً فقال : ” مرحبا , انا مالك مواسي
جاي اليوم مندوب عن مجموعة “الخير فينا” التطوعية , وحابب اخرفكم اكم شغلة ..
قبل لا ابلش بدي أشكر عدة أسماء , شكر من القلب :
قسم الشبيبه بالبلديه والمركز الجماهيري والفرقه الرائعه الي قامت بالمبادره للمشروع واسمها الخير فينا .

منبلش :
بنص العطلة , صحيت الساعة سبعة , ومشي على اجري , رحت على مدرسة الرحمة ,
وقتها مفكرتش شو الناس رح تقول , مفكرتش شو ردة الفعل لاي واحد شايفني ماسك عدة الفعاليات وماشي في الشارع الساعة 7 الصبح !
كل تفكيري بكا اني اليوم رح ابسط ناس , ناس انا شخصيا بقدرهم , طلاب الرحمة مش “مختلفين” مثل ما الناس بتقول , كان تفكيري كلو بقول , انا رايح عند ناس مميزين !
في شغلة لفتت انتباهي , اول ما وصلت الرحمة , نظرة البواب , المعلمة الي بتستقبل الطلاب , حتى لما فتت غرفة الادارة , جدا اختلفت عن نظرتهم في اخر اليوم ..
الاحساس الي اجاني وانا طالع من الرحمة , والضغط الي بكا براسي , والصور الي بتفارقش ذاكرتي , الولد الي رسمتلو ع وجهو , البنت الي ساعدتها تجيب الطابة في السلة , رسومات الطلاب الي تعلقن في الصفوف ( الي بكت 4 حيطان فاظية) , الشب “المشاكس” الي بلفة 15-20 دقيقة بين الفعاليات طلع مع بالونة وقلي شكرا
بعد هذاك اليوم , القومة الساعة 7 في العطلة صارت تحرز بنظري ..
التطوع مش كلمة ، التطوع بالنسبة الي زي شرب المي، لما انتي بتسيتقظ فش هدف بحياتك، فش مقصد، فش طريقة تتبعها بعيشتك، فش اتجاه معين تتبعو!
يمكن يكون التطوع هو البداية نحو اول اشي يغير فيك، والاهم يغير في الي حواليك .. يمكن يكون هو السبب في تغيير الروتين الي عايشو يمكن يكون هو السبب بتغيير حياة شخص معين يمكن يكون هو السبب الي بخليك تصحى كل صبح مع طاقة ونشاط اكبر من اليوم الي قبله !
يمكن لاغلبكم , هدفنا كمجموعة من طلعتنا عهاي الخشبة ونحكي , هو عالاغلب دعاية لالنا , بس لع !
هدفنا كمجموعة من هاي الوقفة هو انو نوصل فكرتنا عن التطوع , نوصل صوتنا , نوصل أشياء يمكن متوصلش لكثير شباب وصبايا ويضيعوا!
ومش شرط يضيعوا ع قهاوي او او .. اي شخص بعرفش يقدم لبلده , لوطنه , لغيره , هو شخص ضايع!
كلمة العطاء , صارت مجرد كلمة عنا , ومنردد شعارات ومنعمل لحالنا دعايات !
بس نسينا نحس بهاي الكلمة , نسينا نعمل هاي الكلمة من نفس وبنية تطوع وبس تطوع .
اخرشغلة ويمكن رح تستغربوا منها , الخير مش فينا ! , اه , صح اسمنا وهيك , بس عنجد الخير مش بس فينا , الخير بكل حدا , الخير مش بس بالمجموعة الي راحت عملت يوم تطوعي في الرحمة , الخير بكل انسان , اساس التطوع الي هو الخير موجود بكل واحد بهاي القاعة , مولود معك , رح يظل جواك , الابداع هو انك تطلعوا , تعطيه فرصته , واكيد رح يغير كثير اشياء فيك , نظرتك للحياة , تعاملاتك اليومية , رح يعملك دستور ورح تمشي عليه , هاظ الدستور مش مقتصر على عمر او دين او معتقد , هذا دستور حياة , هذا الدستور هو الانسان جوا كل واحد فينا !
الاسماء الي سمعتوها في البداية , هي الناس الي انا واقف بحكي باسمهم , هي الناس الي ساهمت بانجاح اول يوم تطوعي في مدرسة الرحمة في 16/4 , هي الناس الي عنجد محبتش تضيع , حبت تعطي , مش عشان شوفوني يا ناس !
هي مجموعة ” الخير فينا” واعلن عن هذا المسرح وبتاريخ 24/4 انطلاقها رسمياً لخدمة هذا المجتمع . ”

يذكر ان مجموعة الخير فينا هي مجموعة شبابية تطوعية تهدف لمجتمع أفضل عن طريق التطوع .

وبعد هذه الكلمات ، أتحف الجمهور الممثل القدير ابن حيفا ، اياد شيتي ، بعرضه لمسرحية حرية ، التي استعرض من خلالها احداث فلسطينية من سنوات الثلاثينات وحتى الستينات بـتمثيله لـ 25 شخصية مختلفة في ذات الوقت !

وبهذا انتهت الامسية ، بنجاح منقطع النظير ، ورضى وبسمة من كل الجمهور الذي حضرها .

وباسم مجموعة فوتوغرافيات وباسم مجموعة الخير فينا ، فاننا نوجه جزيل شكرنا لكل من حضر ، وندعوكم لمتابعتنا دائماً ، لاننا منكم وفيكم ، لكم واليكم .

تنويه: تعليقات الزوار الكرام المنشورة تعبر عن رأي اصحابها فقط ولا تعبر عن رأي موقع هسا بتاتاً.
يرجى الحفاظ على مستوى المشاركه في التعليقات وعدم تعدي الحدود او المس باشخاص او التعليق بما ليس له علاقة بالموضوع المنشور.

أضف تعليقاً

لن يتم نشر عنوان بريدك الإلكتروني.

التعليقات (1)